Усім патрэбна заступніцтва Бога

У мінулую сераду ў Шчучынскім РАУС адбылася незвычайная падзея: яшчэ зацемна, да пачатку працоўнага дня, да людзей у пагонах прыйшлі святары – благачынны Шчучынскай акругі іерэй Аляксандр Пасцерняк і настаяцель касцёла Святой Тэрэзы Авільскай айцец Вітольд Пяцельчыц.

- Такая сустрэча свяшчэннаслужыцеляў праваслаўнай і каталіцкай канфесій з нашымі супрацоўнікамі становіцца добрай традыцыяй. Міліцэйская служба часта мяжуе з рызыкай і небяспекай, таму заступніцтва Усявышняга нам вельмі патрэбна, -- гаворыць начальнік РАУС Аляксандр Іванавіч Шастайла. – Да таго ж падчас вялікіх хрысціянскіх свят многія міліцыянеры знаходзяцца на службе па ахове правапарадку і не маюць магчымасці пабываць на набажэнствах у храмах. Прыход святароў дазваляе людзям памаліцца і прыняць благаславенне. Слова божае, якое гучыць у гэты дзень у сценах райаддзела, валодае вялікай сілай...

Разам, плячом да пляча, стаялі міліцыянеры –  праваслаўныя і каталікі – і ўдумліва слухалі важныя словы, з якімі звярнуліся да іх айцец Аляксандр і айцец Вітольд.

Айцец Аляксандр Пасцерняк павіншаваў супрацоўнікаў міліцыі са святам Хрышчэння Гасподняга, якое адзначалася напярэдадні.

- Самае галоўнае, каб у кожнага з нас, незалежна ад месца ў грамадстве і пасады, была светлая і чыстая душа, -- падкрэсліў благачынны. -- Будзе чыстая душа – будуць чыстыя ўчынкі. І ў першую чаргу кожны хрысціянін – і праваслаўны, і католік – павінен імкнуцца да ачышчэння душы праз пакаянне і выкананне запаведзей Божых.

 Разам са святарамі прысутныя ў зале праваахоўнікі памаліліся і папрасілі божага заступніцтва, атрымалі ад іх благаславенне на нялёгкую службу.

Як і ў два папярэднія гады, свяшчэннаслужыцелі акрапілі святой вадой кабінеты супрацоўнікаў РАУС і раённага аддзела Следчага камітэта, а таксама транспартныя сродкі. У гэты ж дзень міліцыянеры пабывалі на набажэнствах у царкве, дзе паспавядаліся і прычасціліся святых Цела і Крыві Гасподніх, і ў касцёле.

Таццяна ПАЛУБЯТКА
Фота аўтара