Епіскап Антоній узначаліў служэнне літургіі ў Крыжаўздзвіжанскім храме вёскі Свіслач

27 чэрвеня 2021 года, у Нядзелю 1-ю па Пяцідзесятніцы, Усіх святых, епіскап Гродзенскі і Ваўкавыскі Антоній узначаліў служэнне Божай літургіі ў Крыжаўздзвіжанскім храме вёскі Свіслач Гродзенскага раёна.

Архіпастыру саслужылі благачынны Скідзельскай царкоўнай акругі протаіерэй Кірыл Блізнюк і настаяцель храма протаіерэй Андрэй Русак.

Архіерэйскае набажэнства ўпрыгожылі спевы хора пад кіраўніцтвам Юліі Шэпелевай.

З благаславення Патрыяршага Экзарха ўладыка Антоній уручыў старшыні СВК "Свіслач" Васілію Мікалаевічу Густыру ўзнагароду Беларускай Праваслаўнай Царквы — ордэн свяціцеля Кірыла Тураўскага ІІ ступені.

Звяртаючыся да ўсіх прысутных, епіскап Антоній павіншаваў кожнага са святам і пажадаў імкнуцца пераймаць прыклад угоднікаў Божых у следаванні за Хрыстом. Архіпастыр нагадаў, што сёння за літургіяй чытаецца Евангелле, у якім Гасподзь заклікае кожнага з нас узяць свой крыж, бо той, хто не бярэ свой крыж, са слоў Госпада, няварты Яго. Гасподзь заклікае, як і некалі заклікаў тых, чыю памяць мы сёння ўшаноўваем, адкінуць усё тое, што перашкаджае нам сустрэцца з Ім і пайсці за Ім, Яго шляхам. І сённяшні дзень — выдатны доказ таго, што ў канцы гэтага шляху — Царства нашага Госпада.

Дарога за Хрыстом — гэта не роўная сцяжына. Вельмі часта на гэтым шляху чалавек спатыкаецца, але, нягледзячы на гэта, Гасподзь верыць у чалавека і прасцірае яму руку дапамогі.

Па сутнасці, сёння кожны з нас адзначае свае імяніны. Кожны з нас носіць імя пэўнага святога, і вельмі важна, каб у вечнасці нам не было сорамна сустрэцца з тымі, у гонар каго мы атрымалі імёны пры Святым Хрышчэнні, і тым больш з Тым, Хто памёр за нас на Крыжы, і з Яго Прачыстай Маці, бо наша праведнае жыццё — найлепшая  ўдзячнасць Госпаду і Прасвятой Дзеве Марыі.

Зьміцер Даўгаполік-Пратасевіч

Фота: Мiкалай БАЙДА