Дабрачынны Велікодны канцэрт адбыўся ў дамавым храме ў гонар Свяціцеля Мікалая Цудатворцы

16 мая 2021 года ў дамавым храме ў гонар Свяціцеля Мікалая Цудатворцы Гродзенскага епархіяльнага ўпраўлення на Архіерэйскім Падвор’і адбыўся дабрачынны Велікодны канцэрт.

Напачатку дабрачыннага канцэрту кіраўнік сацыяльнага аддзела Гродзенскай епархіі іерэй Павел Сяргееў павітаў усіх прысутных, расказаў пра сацыяльны цэнтр “Васількі” і звярнуў увагу на арганізаваны збор сродкаў для будаўніцтва інклюзіўных майстэрняў па вуліцы Міхася Васілька, 5. Пасля гэтага айцец Павел перадаў слова вядучаму Велікоднага канцэрта Мікалаю Емяльянаву.

Мікалай урачыста прадставіў зводны хор праваслаўнага моладзевага брацтва ў гонар святога дзіцяткі Гаўрыіла Беластоцкага і дзіцячага ансамбля нядзельнай школы “Анёлкі” пад кіраўніцтвам рэгента Альжбеты Даўгаполік.

Канцэрт складаўся з дзвюх частак: традыцыйныя царкоўныя песнапенні і рэлігійныя канты. У выкананні калектыву прагучалі самыя выбітныя пасхальныя песнапенні: стыхіры Пасхі, эксапастылар, вялікі пракімен, трапар Пасхі на грэчаскай мове і інш.

Напачатку другой часткі канцэрта ўступнае слова было прадастаўлена Ларысе Даўгаполік, якая расказала пра велікодныя традыцыі з яе дзяцінства, а таксама пра валачобныя песні, пасля чаго перадала слова хору. У другой частцы калектыў выканаў велікодныя канты на рускай і беларускай мовах (пераклад некаторых твораў на беларускую мову зрабіла сама Альжбета), таксама прагучала два творы, аўтарам тэксту якіх з’яўляецца свяціцель Мікалай Сербскі. Напрыканцы хор выканаў гімн усіх праваслаўных моладзевых мерапрыемстваў, злётаў, вечарын і іншых моладзевых царкоўных падзей “Вера вечна”.

Завяршыўся канцэрт трапаром Пасхі на трох мовах: грэчаскай, лацінскай і царкоўна-славянскай.

Настаяцель храма іерэй Мікалай Гайдук падзякаваў харавому калектыву і кіраўніку за такое сапраўднае свята для ўсіх прыхаджан і гасцей. Кожны з удзельнікаў канцэрта атрымаў салодкі падарунак, а кожны глядач і слухач атрымаў сапраўдную асалоду ад пачутага і ўбачанага.

Усе прысутныя сыйшліся на думцы і выказалі надзею, што такое мерапрыемства стане прыгожай парафіяльнай традыцыяй.

Арганізатары дабрачыннага Велікоднага канцэрта выказваюць шчырую падзяку ўсім, хто спрычыніўся ў сваёй дапамозе.

Фота: Юрый Дэглау