Адкрыты ўрок на тэму “Еўфрасіння Полацкая – асветніца зямлі беларускай”
24 мая 2015 года ў нядзельнай школе храма ў гонар Сабору Усіх Беларускіх Святых, у 2 “А” класе прайшоў адкрыты ўрок на тэму “Еўфрасіння Полацкая – асветніца зямлі беларускай”, прысвечаны Дню праваслаўнай кнігі. Гэты ўрок з’явіўся апошнім у навучальным годзе мерапрыемствам, якія праводзіліся на прыходзе з мэтай рэалізацыі епархіяльнага праекта “Дзень праваслаўнай кнігі”. Наступныя запланаваныя мерапрыемствы дадзенага праекта пройдуць ужо ў новым навучальным годзе, у перыяд з верасня па лістапад.
З дапамогай мульцімедыйнага раду вучні пазнаёміліся на ўроку з жыціем прападобнай Еўфрасінні Полацкай, уважліва разгледзелі абразы святой з фрагментамі жыція, паспрабавалі разам з настаўнікам вызначыць яе ролю ў распаўсюджванні кніг і адукацыі на беларускіх землях.
Асаблівую цікавасць вучняў вызваў тэатральны вобраз Еўфрасінні. У сярэдзіне ўрока ў клас завітала сама “прападобная” у манаскім адзенні і звярнулася да прысутных з наступнымі словамі:
Забыць сваё імя, дзе корань роду слаўны?
Няпраўда, я твая ўнучка, Усяславе!
Ды годнасці маёй давеку не дакажуць,
Што найслаўнейшы той, хто мае тытул княжы.
Чакаюць, бацькаў двор і мне пасадам стане.
І кроку не ступіць за пышнымі сватамі.
Гандлюючы сабой з уласнай чэсцю згодна,
Няўжо мне быць рабой для памнажэння роду?
На іхняй славе тлен – нарошчаны вякамі.
Імя іх не ўзнясе і надмагільны камень.
Ды кожны задрыжыць сваёй душою сподняй
У найапошні міг прад воляю Гасподняй…
Для іх сляпых дзяцей, для іх нямых унукаў,
Што зведаюць нябыт і чорны дзень прынукі,
Я знаю, што зраблю перад судом суровым:
Я славу зберагу, я прынясу ім слова!
“Святая” пакінула кожнаму вучню “Запавет нашчадкам” у выглядзе свёртка. Гэты запавет дзеці атрымалі ў канцы сустрэчы і задаволеныя панеслі дадому.
Ролю Еўфрасінні Полацкай цудоўна выканала выпускніца Нядзельнай школы – Надзея Барэль.
Вялікая ўвага на ўроке была адведзена пытанню перапісвання кніг. Сучасным вучням складана ўявіць сабе, што калісьці кнігі перапісвалі, і нават некаторыя людзі, у тым ліку і Еўфрасіння, прысвячалі гэтаму ўсё жыццё. З захапленнем дзеці прымалі ўдзел і ў практычнай частцы занятку, дзе ім трэба было ўпрыгожыць літары, як гэта рабілі раней перапісчыкі, у старажытных кнігах. Пасля напісання прыгожых літар дзеці склалі з іх надпіс: “Еўфрасіння Полацкая”. Гэтыя словы прымацавалі на дошцы каля рэпрадукцый ікон, з фрагментамі жыція прападобнай.
У канцы ўрока вучні змаглі самастойна адказаць на пытанне, чаму Еўфрасінню Полацкую называюць асветніцай і, такім чынам, падвесці вынік усяго вышэй сказанага.
Увазе дзяцей была прадсаўлена таксама і выстава кніг, прысвечаная асветніцы зямлі беларускай - Еўфрасінні Полацкай.
Святлана ПАНЦЭВIЧ